Кон за пооштрованє мирох

Епидемиолоґ Предраґ Кон гварел же ше пияти дзень зазначує же крива охорйованя од коронавирусу вировнана, алє и далєй потребни барз оштри мири. Додал же фах ище роздумує о пооштрованю мирох.

Добре зме, у цалей тей ситуациї ми добре. Надалєй мушиме буц барз строги у шицких мирох котри зме виплановали, гварел Кон на конференциї за медиї.

Вон визначел же присутни страх же вирус войдзе до чувствительних стредкох и же ше епидемия нагло прешири, насампредз у домох за старих, бо то найчувствительнєйше место котре оебне барз добре чувац. Ту вирус нє шме войсц и тото на шицки способи треба зопрец, спозорел Кон.

Вон додал же мушиме чекац, з дня на дзень. “Мири озбильни, шицки того свидоми. Увидзи ше яки числа буду през викенд и потим ше будзе мушиц одлучовац” – гварел Кон.

Кед же будзе потребне пооштрованє мирох, будзе тото требац зробиц цо скорей, заключел вон.

Кон визначел же фах нє роздумує о означованю швета, алє о зопераню ширеня коронавирусу, провадзи числа и, кед будзе потребне, принєше и оштрейши мири.

Вон так одвитовал на питанє новинарох чи за шлїдуюци викенд, кед ше означує Велька ноц по юлиянским календару, будзе предлужена полицийна годзина котра би тирвала од штвартку по пондзелок.

Додал же, кед числа у наступних дньох укажу же терашнї мири мали ефекти, теди фах ище раз роздума чи оштрейши мири нєобходни и предложи одвитуюци одлуки.